Salianji nga Korça: Demokratët më të bashkuar se kurrë kundër Ramës

Deputeti i Partisë Demokratike për qarkun e Korçës, Ervin Salianji, zhvilloi një takim me strukturat drejtuese të kësaj partie në Qarkun e Korçës.

Në fokus të takimit ka qenë diskutimi i situatës aktuale që po kalon Paria Demokratike nga sulmet e maxhorancës dhe sistemit të drejtësisë.

I pyetur pikërisht për situatën me liderin e Partisë Demokratike, Sali Berisha, Salianji është shprehur se kjo çështje është diskutuar dhe në takim me strukturat, ndërsa ka theksuar se opozitarët dhe aleatët janë bashkë për të luftuar kundër regjimit të Edi Ramës.

Në lidhje me bashkimin e demokratëve, Salianji është shprehur se shembulli për këtë kauzë është bashkimi i deputetëve të grupit parlamentar.

Ai theksoi se së shpejti do të gjendet mekanizimi për t`u bashkuar në të gjitha dimensionet e jetës partiake.

Gjatë fjalës për mediat, Salianji ka shprehur qëndrimin ndaj Lulzim Bashës, duke e cilësuar si një nga njerëzit që në mënyrë brutale për interesa personale ka dëmtuar Partinë Demokratike, ndërsa deklaroi se gjykata e lartë ka lënë në fuqi vendimin e gjykatës së shkallës së parë, që njeh kuvendin e rithemelimit.

Ervin Salianji, u shpreh gjithashtu, se masa e sigurisë ndaj liderit të opozitës, Sali Berisha, nuk do të shërbejë për t`u shfrytëzuar nga askush për të goditur njëri-tjetrin, ndërsa theksoi se ky moment do ta forcojë më shumë Partinë Demokratike.

“Forca e madhe e Partisë Demokratike janë anëtarët, simpatizantët, qëndrestarët!

Duke vlerësuar së pari kapacitetet e sprovuara si fitues në fushata, PD ka nevoje jetike për bashkim e më tej rinovim, rikonceptim! Burimi, themeli, zanafilla jonë, janë dhe duhet të jenë njerëzit!

Fuqia më e madhe e Partisë Demokratike janë, anëtarët, ata që kurrë nuk të lëshojnë edhe pse kanë të drejtë, më shumë se kushdo, të kritikojnë.

Fuqia e këtyre njerëzve qëndrestarë e luftarakë, buron nga energjia e rinovimit, rikonceptimit, risive të pashterueshme që duhet të ketë dhe i ka jetike sot me shumë Partia Demokratike.

Fuqia jonë vjen nga rrënjët që janë strukturat e që duhen ushqyer e jo grryer.”, u shpreh ai.