Deputeti i PD, Ervin Salianji ka deklaruar se njerëzit që po ndjekin Sali Berishën, janë njerëz që për tetë vite kanë dëmtuar Partinë Demokratike dhe tani po hiqen sikur intereson për këtë forcë politike për të përfituar nga situata brenda opozitës. Gjatë një interviste për News 24, Salianji ka deklaruar se Berisha është në të drejtën e vet, por njerëzit që e rrethojnë, thjesht duan të përfitojnë.
“Berisha nga ana tjetër është në të drejtën e vet, është në shtëpinë e vet në Partinë Demokratike për të diskutuar, për të folur dhe për të ndarë mendimet e veta. Unë po flas për njerëz që po tentojnë të përfitojnë nga kjo situatë se tani nuk mund të rri pa e thënë se njerëz që i kemi pasur përballë për tetë vite, disa në parti të krijuara nga Rama, disa duke legjitimuar gjithçka që bën Rama, disa karrige-thyer që nuk u kanë hapur telefonin demokratëve, që nuk i kanë legalizuar, që nuk i kanë futur me meritë nëpër punë, që kanë pasuruar veten dhe familjet e tyre në kohën e pushteti të Partisë Demokratike dhe në 8 vite që ne jemi në opozitë dhe shumë prej demokratëve janë të papunë, janë të goditur në bizneset e tyre, sakrifikojnë duke çuar fëmijët jashtë për të jetuar, një pjesë punojnë në punë sezonale dhe kthehen për të jetuar në Shqipëri dhe nuk kanë asnjë përfitim prej Partisë Demokratike, dëgjojnë disa njerëz që kanë kaluar nëpër partiza të ndryshme, i kemi pasur përballë dhe në zgjedhje dhe tani bëjnë sikur kanë interesin e Partisë Demokratike. Tani është që duhet të përmbahesh shumë që t’i durosh në këtë kuptim. Prandaj e thashë interesi racional i cilitdo që mendon, duhet të jetë bashkimi rreth Partisë Demokratike për të pasur vetëm një gjë në fokus, a është interesi i Partisë Demokratike apo jo”, deklaroi Salianji.
Deputeti i Partisë Demokratike, Ervin Salinaji nuk ka kursyer as ironinë në lidhje me deklaratën e Evi Kokalarit, gjatë një takimi që ish-kryeministri Sali Berisha pati me simpatizantët në Durrës.
“Qytetarët që marrin fjalën në këto takime janë të profileve të ndryshme. Personazhet që për nga përmbajtja duken boshe dhe kanë shfaqje skizofrenike….apo të kthejnë shpirtrat e mirë afër, me këta njerëz, apo këto profile që shiten si të tillë, ka parë shumë Shqipëria. S’kam koment. Ka shumë Shqipëria kështu! Nuk është ironi, por përshkrim që mendoj se është më realist i personazheve të këtij lloj që Shqipëria ka personazhe të shumta. Besoni që me një të prekur mund të shëroheni nga tumori? Në kodrën përballë në Tiranë ka pasur shenjtorë të tillë, Leonora quhej”, u shpreh me ironi Salianji.
