Ish-deputeti i Partisë Demokratike, Ervin Salianji, ishte i ftuar në Klan News, ku analizoi pak sjelljen e opozitës në Kuvend, si dhe risinë e re të qeverisë, ministren “Diella”, e krijuar prej Inteligjencës Artificiale.
Lidhur me programin e qeverisë, i cili nuk u arrit në asnjë moment të prezantohej pas tensioneve të shkaktuar në sallën e Kuvendit që pas “fjalimit” të “Diellës”, Salianji u shpreh se në fjalë të tjera se është prekur interesi publik me këtë gjë. Kjo është hera e parë që nuk prezantohet programi qeverisës, e ndaj për demokratin ajo ishte një ditë e humbur, pas sherrit me opozitën.
“Së pari një herë duhet të flasim për interesin publik, interesin e qytetarëve. Interesi publik dhe i të gjithë qytetarëve është të dëgjojë programin i qeverisë. Nuk ka nevojë për të gjetur artifica nga ana e qeverisë për të shmangur prezantimin e programit, e po ashtu edhe debatin e deputetëve në raport me programin. Kuptohet që mazhoranca duke qartësuar programin e vet nëse ka, e opozita duke bërë opozitën dhe mbrojtjen e interesit publik, apo pjesën e kundërshtisë së programit. Në këtë kuptim, unë mendoj se kjo ishte një ditë e humbur. E para herë që ndodh. Nuk ka ndodhur ndonjëherë mosprezantimi i programit”, tha ai.
Sipas Salianjit, mos prezantimi i programit, tregon se Rama nuk ka durim për t’u përballur me kritika.
“Tregon se është patologji, se nuk mund të them frikë. Është një lloj patologjie, apo padurimi i kryeministrit Edi Rama, qoftë për t’u përballur me kritika verbale në Parlament. Pra, i do të gjitha siç i ka PS, siç i ka në qeveri, siç i ka në drejtësi për fat të keq, siç i ka në të gjitha institucionet e tjera që duhej të ishin të pavarura”, shtoi ai.
Pas pretendimeve të opozitës se dalja e Diellës ishte një kurth, Salianji këshilloi se deputetët nuk duhet të bien pre e këtyre “grackave”.
“Mungesa e interesit të qeverisë për të bërë prezantimin, që nuk ka se duhet të ketë dhe bilanc pas 12 vitesh, është një element i cili është I dëmshëm për interesin publik. Nga ana tjetër, nëse opozita dhe kolegët e grupit parlamentar e kanë cilësuar një kurth, unë mendoj se duhet të shmangin kurthe të tilla”, këshilloi Salianji.
Nga ana tjetër, për ish-deputetin, “Diella” nuk përfaqëson një figurë shqetësuese për qytetarët. Sipas tij, ministrja prej AI, është thjesht një marketing i Ramës, ose siç e cilësoi demokrati, “operacion PR”. Për Salianjin, “Diella” është thjesht një “vëmendje mediatike”.
“Nuk besoj në fakt se shqetësimi i qytetarëve është Diella apo një lodër tjetër e Edi Ramës. Kemi të bëjmë, le të themi, me një operacion PR-i, në këndvështrimin tim, duke qenë se ka një patologji tjetër kryeministri për t’u dukur si lider global. Një herë del e thotë shteti bektashi që merr vëmendje. Tani do dali që është qeveria e parë që bën një ministre, që në fakt nuk është as ministre se duhet të jetë person fizik. Pra, ai do të prodhojë lajm”, u shpreh Salianji.
Discussion about this post