Deputeti Ervin Salianji dhe analisti Preç Zogaj u përfshinë në një debat gjatë emisionit “Opinion” lidhur me zhvillimet në Partinë Demokratike.
Debati me tone të forta erdhi pasi Zogaj tha se opozita ka të bëjë me cilësinë dhe jo me sasinë, duke mos i dhënë rëndësi faktit nëse ajo ka 10 apo 40 deputetë.
“Opozita është pakicë, ndaj dhe sipas mendimit tim, nuk ka rëndësi sasia e deputetëve, por cilësia, vlerat e tyre. Të tjerat janë “llogje kavaje”. Ky që kam përballë ishte kundra Berishës, tani ka tjetër qëndrim, ndaj mendoj se opozita është moral”, tha Zogaj.
Duke reaguar deputeti Salianji i tha Zogajt “së pari atë shprehjen mos e përdor se është pezhorative, ka kuptim negative. Së dyti meqë ti më drejtohesh me “ky” atëherë po të them: ky që kam përballë njëherë del në krah të Ramës, njëherë në krah të Berishës, njëherë me Bashën, njëherë me Metën, sipas interesave apo sipas stinëve të vitit”.
Në vijim të debatit, Zogaj tha se një pjesë e opozitës sot ka bërë një kallëzim penal lidhur me kullën 205 metra të lartë, ndërsa pjesa tjetër hesht, nuk flet.
Ndërsa Salianji i ka kujtuar Zogajt denoncimet e pafundme që janë bërë dhe në fund janë lënë në mes nga Lulzim Basha.
“E dini atë punën e gjobave, që nisin denoncimet derisa hiqet dorë, sepse është paguar ajo gjoba. Unë kam denoncuar pafund raste, me kulla e me katet që përfitojnë drejtorë e deputetë dhe ndërkohë nga këto që na tregon Zogaj sot nuk është folur asnjë fjalë. Pse u la në mes, pse u tradhëtuan ato qytetarët për traun në rrugën e Kombit? Nëse doni të bëjmë një emission për denoncimet e bëjmë dhe jam gati t’ua numëroj të gjitha”, tha Salianji.
Discussion about this post