Besnik Mustafaj, ish-ministër i Jashtëm dhe ish-deputet, e konsideroi si një zhvillim shumë pozitiv për Shqipërinë mbajtjen e Samitit të Procesit të Berlinit në Tiranë, por akuzoi Qeverinë shqiptare se në samite të tilla shkon me duar në xhepa, pa pasur asnjë projekt.
Ai tha se ky samit ishte më tepër si një gjysmë feste, pasi nuk u dol me asnjë deklaratë të përbashkët, apo rezolutë.
“Procesi i Samitit të Berlinit në Tiranë është një ngjarje e rëndësishme dhe për imazhin e Shqipërisë për marrëdhëniet me ndërkombëtarët. Organizimi ishte i mirë, duke përfshirë këtu dhe sigurinë. Nuk u dol me një deklarate të përbashkët, apo rezolutë”, tha Mustafaj.
Në studion e News24, Mustafaj tha se në samite të tilla nuk mjaftojnë deklaratat e bukura të kryeministrit Edi Rama për thithjen e fondeve nga Bashkimi Evropian, por duhen projekte konkrete.
“Çështja e integrimit të Shqipërisë është një gjë që përsëritet prej shumë vitesh. Defekti nuk ka qenë në BE, por në Tiranë. Mua më duket i realizueshëm nga Brukseli.
Qeveria shqiptare në mënyrë të përsëritur në mbledhjet e samiteve shkon me duar në xhepa. Nuk ndërton projekte dhe ky është një problem i madh që çon në thithjen e fondeve. Nëse qeveria shqiptare do të hartonte projekte dhe t’i prezantonte, do ishte e mundshme thithja e tyre. Deklaratat e bukura të Ramës nuk mjaftojnë që fondet të vijnë. Ne kemi bllokimin e fondeve për bujqësinë, pse? Sepse ka korrupsion.”, u shpreh Mustafaj.
Discussion about this post