Liderët e Ballkanit Perëndimor kanë miratuar tre marrëveshje në kuadër të “Procesit të Berlinit”, ku i pranishëm është dhe kryeministri Edi Rama. Bëhet fjalë për marrëveshjet që kanë të bëjnë me lëvizshmërinë e qytetarëve në Rajon, pa pasaporta dhe vetëm me karta identiteti, njohjen e diplomave dhe mundësinë e punësimit të disa profesioneve.
Kancelari i Gjermanisë, Olaf Scholz në fjalimin e tij në Samitin e Berlinit ka thënë se vendet e Ballkanit Perëndimor janë përkushtuar të punojnë së bashku për të arritur qëllimet dhe synimet në Tregun e Përbashkët Rajonal dhe jo vetëm. Scholz në këtë samit tha se procesi i normalizimit të raporteve në mes të Kosovës dhe Serbisë duhet të përshpejtohet.
Ky samit është konsideruar si lëvizje drejt integrimit të mëtejshëm dhe stabilitetit të rajonit që vendet si Serbia, Mali i Zi, Bosnjë e Hercegovina, Maqedonia e Veriut, Kosova dhe Shqipëria t’i afrohen anëtarësimit në Bashkimin Evropian, për shkak të frikës nga ndikimet gjithnjë e më të shtuara të Rusisë dhe Kinës në rajon.
Procesi i Berlinit filloi vitin 2014 me iniciativën e kancelares Angela Merkel. Qëllimet kryesore të këtij procesi janë, përmirësimi i bashkëpunimit rajonal dhe integrimi evropian i rajonit të Ballkanit Perëndimor.
Discussion about this post