Kryeministri Edi Rama ndodhet në Londër, aty ku po merr pjesë në Samitin për Investime në Ballkanin Perëndimor 2022, e organizuar nga Banka Evropiane për Rindërtim dhe Zhvillim (BERZH). Të pranishëm janë dhe homologët e tij të rajonit, përfshirë kryeministrin e Kosovës Albin Kurti.
Kryeministri Rama e nisi fjalën e tij me një mesazh solidarizimi për Ukrainën, ndërsa gjithashtu evitoi shifrat duke u ndalur sipas tij, në fakte konkrete se përse duhet investuar në Shqipëri.
“Më lejoni që të dërgoj solidaritetin për popullin e Ukrainës. Investimi në Shqipëri apo në vende të tjera është më shumë se të investosh në një vend, por në një rajon me potencial ende të pashfrytëzuar. Ballkani Perëndimor është vendi i investimeve. Falë faktit që të gjitha vendet e rajonit po përmirësohen, sa për Shqipërinë, besoj se jemi në një fazë të re. Është e qartë për njerëzit që vizitojnë Shqipërinë, se jemi një parajsë e turizmit. Nuk do ju bezdis me shifra, duke thënë kishim numrin më të lartë, nuk do t’i bashkohem por vetëm dua t’ju them që ne dhe gjatë momenteve të më këqija të pandemisë kemi parë rritje të turizmit. Po shohim shumë gjëra që po ndodhin, jemi duke përgatitur investime masive në energji me kompani të huaja. E njëjta gjë falë qëndrimit të Komisionerit Varhely dhe nxitjes së tij për ta sjellë më pranë Ballkanit. Kemi shtigje të reja në infrastrukturën tonë, shpresoj se do të jemi në gjendje të bëjmë më shumë, me Kosovën kemi hekurudhën dhe me Maqedoninë korridorin e 8”, tha Rama.
Në orën 17:30 të gjithë liderët e Ballkanit Perëndimor do të priten në një takim nga kryeministri britanik Johnson. Samiti u hap nga presidenti i BERZH-it Odile Reno Basso dhe komisioneri i Fqinjësisë dhe Zgjerimit Evropian Oliver Varhely. Në Samitin e Investimeve për Ballkanin Perëndimor marrin pjesë edhe kryeministrat e Malit të Zi Zdravko Krivokapiç, Maqedonisë së Veriut, Dimitar Kovaçevski, dhe kryetari i Këshillit të Ministrave të Bosnjës dhe Hercegovinës Zoran Tegeltija.
Discussion about this post