Kryeministri i Kosovës, Albin Kurti, nuk ka konfirmuar pjesëmarrjen në takimin e liderëve të Ballkanit Perëndimor që do të mblidhen ditën e nesërme në Tiranë, me ftesë të kryeministrit Edi Rama.
Ndërkohë raportohet se Kurti mund të delegojë si përfaqësues të Kosovës në këtë takim, zv.kryeministrin Besnik Bislimi.
Presidenti i Serbisë, Aleksandër Vuçiç, kryeministri në detyrë i Malit të Zi, Dritan Abazoviç, kryeministri i Maqedonisë së Veriut, Dimitar Kovaçevski, si dhe kryetarja e Këshillit të Ministrave të Bosnjë-Hercegovinës, Borjana Kristo, kanë konfirmuar pjesëmarrjen.
Sipas një komunikate të Qeverisë së Kosovës, kryeministri, Albin Kurti nga sot po merr pjesë në edicionin e 25-të të Simpoziumit Ndërkombëtar SYMI, që mbahet në Greqi e ku po marrin pjesë politikanë progresistë e akademikë të shquar.
Liderët e rajonit së bashku me komisionerin për Zgjerimin, Oliver Varhelyi, do të drekojnë në mesditën e të hënës, në takimin joformal, në kuadër të Procesit të Berlinit.
Këto mbledhje koordinuese kanë për qëllim që rajoni të krijojë një plan të përbashkët veprimi kur në tetor të ulet në tryezë përballë Bashkimit Evropian.
Samiti i Berlinit është një format i nisur nga Gjermania, në të cilin kanë marrë pjesë pa rezerva të gjitha vendet e Ballkanit Perëndimor. Përfshirë edhe Kosovën, që ka qenë një kritike e madhe e Open Ballkan, të cilin Rama për momentin e ka lënë mënjanë.
Mbërritja e krerëve të Ballkanit, ishte paralajmëruar nga Edi Rama në turin Ballkanik të zhvilluar pak ditë më parë, ndërsa në Samitin e NATO-n në Lituani, kryeministri foli edhe për një vizitë të Presidentit francez, Emanuel Macron.
Kujtojmë se më 6 dhjetor 2022 në Tiranë, u mbajt samiti i Ballkanit Perëndimor dhe Bashkimit Evropian.
Discussion about this post