Në Samitin e Klimës “COP26” që po mbahet në Glasgow të Skocisë, kryeministri i Shqipërisë, Edi Rama është takuar me aktorin e njohur amerikan, Leonardo Di Caprio.
Ishte Rama ai që ka ndarë një fotografi në llogarinë e tij në Instagram ku shihet teksa bisedon me aktorin 46-vjeçar.
“Kur je komshi me Leonardo Di Caprion dhe të lidh mbrojtja e Vjosës”, ka shkruar Rama në mbishkrimin e fotografisë, duke etiketuar aktorin.
Kujtojmë që aktori i njohur Leonardo Di Caprio ka mbështetur nismën për mbrojtjen e lumit të Vjosës në Shqipëri që nga viti 2019.
Di Caprio ka qenë aktiv vazhdimisht për çështjen e Vjosës, i cili ka reaguar edhe vitin që lamë pas në lidhje me deklaratën e kryeministrit Edi Rama më 25 shtator ku refuzoi zyrtarisht të japë leje për projekte HEC-esh në Vjosën e poshtme.
Por, edhe këngëtarja Ellie Goulding i është bashkuar fushatës për mbrojtjen e lumit Vjosa nga HEC-et. Goulding është shprehur se këto ndërtime do të dëmtonin kultura të shumta dhe të larmishme të rajonit duke nxitur edhe ndotjen e shkatërrimin e klimës.
Ndërkohë, Samiti i Klimës ka bërë bashkë liderët botëror për të ngritur vëmendjen ndaj ngrohjes globale dhe kushteve klimatike, i cili pritet të zgjasë deri më 12 nëntor.
