Nënkryetarja e Kuvendit të Kosovës, Saranda Bogujevci, i është përgjigjur anëtares së delegacionit nga Serbia në Këshillin e Europës duke i treguar shenjat në duar që ka nga plumbat që kishte marrë në moshën 13-vjeçare në luftën e vitit 1999 nga ushtria serbe, ku i është vrarë pothuajse e gjithë familja.
Ajo iu mbijetoi 16 plumbave dhe humbi 14 anëtarë të familjes së saj, përfshirë nënën dhe dy vëllezërit.
“25 vjet më parë si 13-vjeçare i kam mbijetuar një masakre të ushtrisë serbe, që atëbotë ishte udhëhequr nga njerëzit që ende udhëheqin Serbinë tash. Si 13-vjeçare unë mbeta e shtrirë në një grumbull të trupave të familjes sime me 16 plumba. Sot i kam ende këto shenja në dorë dhe pjesët e tjera të trupit tim.
E të shoh 25 vjet pas, që vazhdimisht sulmohemi verbalisht dhe në mënyra tjera, së fundi edhe me sulm terrorist, është e papranueshme.
Mjaft është mjaft. Kurrë nuk ka pasur kërkim falje, nuk ka pasur asgjë të ndërmarrë për të sjellë drejtësi, jo vetëm për atë çfarë ka ndodhur atëherë, por edhe tash. Njerëzit që kryen sulm terrorist më 24 shtator janë në Serbi, e nuk po gjykohen”, tha ajo.
Discussion about this post