Kontrollet blic në Sarandë, kanë “fundosur” një person të njohur për drejtësinë shqiptare. Bëhet fjalë për 42-vjecarin e identifikuar me emrin Klaudio (Drini) Kroj banues në Ksamil, Sarandë.
Arrestimi i trafikantit me dy emra u bë pasi është kapur në flagrancë, nga shërbimet e Policisë, duke shpërndarë lëndë narkotike kokainë dhe kanabis në zonën e Ksamilit. Ndërsa theksojmë se ai është dënuar më parë për veprën penale “Prodhimi dhe shitja e narkotikëve”.
Policia jep detaje se gjatë kontrollit fizik dhe atij në banesë, shërbimet e Policisë gjetën dhe sekuestruan në cilësinë e provës materiale një sasi me lëndë narkotike të dyshuar kanabis, një sasi me lëndë narkotike të dyshuar kokainë, një pjesë e saj e ndarë në doza gati për shitje, 1 aparat celular dhe 1 motomjet.
Pritet që trafikanti të përballet me akuzën për veprën penale “Prodhimi dhe shitja e narkotikëve”.
