Një rast i organizuar i shfrytëzimit për prostitucion është goditur nga Drejtoria e Policisë së Vlorës, në qytetin e Sarandës.
Dy muaj hetime kanë mjaftuar për të finalizuar operacionin e koduar “Silent Watch”, me metoda proaktive, përgjime dhe ndjekje me agjentë.
Nga hetimet u zbulua rasti i shfrytëzimit të një vajze të mitur, vetëm 16 vjeçe, në dy lokale të marra me qira në lagjet e qytetit bregdetar. Në pranga ranë 2 gra të dyshuara që e shfrytëzonin për aktivitetin e paligjshëm minorenen.
“Si rezultat i hetimeve të kryera me metoda proaktive, gjatë 2 muajve, nga Seksioni për Hetimin e Trafiqeve, në bashkëpunim me Komisariatin e Policisë Sarandë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, u finalizua operacioni policor i koduar “Silent Watch”. Gjatë operacionit u kapën dhe u vunë në pranga: S. O., 42 vjeçe dhe L. D., 39 vjeçe, të dyja banuese në Sarandë”, bëri me dije policia vendore.
Gjatë kontrolleve në dy lokale të marra me qira prej tyre, në lagjet nr. 3 dhe nr. 4, në Sarandë, në të cilat ushtrohej prostitucioni, u gjet edhe një shumë parash e dyshuar e përfituar nga kjo veprimtari e paligjshme, e cila u sekuestrua në cilësinë e provës materiale.
Hetimet e mëtejshme të rastit do i ndjekë prokuroria vendore, për të zbardhur aktivitetin kriminal, dinamikën dhe persona të tjerë të implikuar.
Discussion about this post