Kapet me kokainë, arrestohet 38-vjeçari në Tiranë

Një 38-vjeçar është arrestuar nga Policia e Tiranës, pasi dyshohet se shpërndante lëndë narkotike kokainë në kryeqytet.

Në pranga ka rënë shtetasi me inicialet A. K., 38 vjeç, banues në Tiranë.

Sipas policisë, ai u ndalua në fshatin Mëzez, ku gjatë kontrollit të ushtruar në automjetin tip “Audi” që drejtonte, u gjetën rreth 100 gramë lëndë e dyshuar narkotike kokainë.

Nga veprimet e para hetimore rezulton se kokaina ishte e ndarë në doza dhe dyshohet se ishte gati për t’u shpërndarë në tregun e kryeqytetit.

Në cilësinë e provës materiale, policia sekuestroi sasinë e dyshuar të kokainës, si dhe automjetin e përdorur nga 38-vjeçari.

Materialet procedurale i janë referuar Prokurorisë së Tiranës, e cila po vijon hetimet për të zbardhur plotësisht aktivitetin e dyshuar kriminal dhe për të dokumentuar të gjitha rrethanat e rastit.