Klubi i Egnatias ka bërë sot prezantimin e uniformave të reja, më të cilat do të luajë në sezonin 2023-24 në Abissnet Superiore.
Rrogozhinasit nisin sezonin në futbollin elitar shqiptar me ambicie për të përsëritur mrekullitë e edicionit të kaluar, që e mbyllën në vendin e tretë në kampionat dhe si fitues të Kupës së Shqipërisë.
Sot, presidenti i klubit rrogozhinas Agim Demrozi, ka prezantuar fanellat e reja përkrah kapitenit Renato Malota si dhe sulmuesit Rafael Duamena, dy prej figurave përfaqësuese të kësaj skuadre, të cilat pritet të jenë shtyllat e ekipit edhe në edicionin e ri.
Fanella e parë do të ketë përsëri të theksuar ngjyrën e gjelbër, këtë herë me shirita të zinj, dallohet ngjashmëria me Sassuolon. Ndërsa fanella e dytë është larg tradicionales, pasi kombinon ngjyrat e bardhë dhe të kuqe, me kuadratet që e bëjnë të ngjajë me fanellën e kombëtares së Kroacisë.
Fanellat e reja do të debutojnë në ndeshjen e 13 gushtit ndaj Interit të Milanos (nuk dihet ende se cila nga fanellat), miqësoren e luksit të rrogozhinasve gjatë kësaj vere.
Discussion about this post