Për kreun e PBDNJ-së, Vangjel Dule humbja e zgjedhjeve parlamentare të 25 prillit nga PD, është dështimi më i madh për opozitën ndërsa përgjegjës për këtë bën kryedemokratin Lulzim Basha.
“Ne dështuam jo vetëm që të arrinim fitoren, po edhe të sjellim atë që pritej. Ishte një nga rastet, që kam qenë në vijën e parë pothuajse si kandidat dhe e konsideroj dështimin historik të këtyre 30 viteve”, tha Dule në emisionin “Breaking” në Top Neës.
Sipas tij, Basha nuk i thirri asnjëherë aleatët në zgjedhjet e 25 prillit dhe nuk bëri fushatë, duke e akuzuar për shmangien e aleatëve.
“Takimi i fundit mes Bashës dhe aleatët ka qenë në shkurt të këtij viti, më pas nuk kemi pasur. Kjo ka reflektuar dhe sa i përket më pas edhe votave në zgjedhjet e 25 prillit”, tha Dule.
Sa i përket përplasjeve brenda PD-së, Dule u shpreh se kjo dëmton së tepërmi opozitën.
