Çështja se a duhet të armatoset Ukraina me aeroplanë luftarakë, “tani për tani s’ka logjikë”, ka thënë kancelari gjerman, Olaf Scholz, në një intervistë, kur është pyetur për thirrjet që Perëndimi ta adresojë këtë kërkesë.
Në intervistën e televizionit publik gjerman, ZDF, kancelari, i cili më parë ishte ballafaquar me kritika për atë që shihej si zvarritje për dërgimin e tankeve në Ukrainë, tha se vështirësitë e vendeve të tjera për plotësimin e kërkesave të Ukrainës kanë dëshmuar se vendimi i tij për të lëvizur në harmoni me to ka qenë i drejtë.
Më herët këtë muaj, Gjermania u pajtua që të dërgojë tanke në Ukrainë dhe që t’i lejojë edhe shtetet e tjera që ta bëjnë këtë. Pavarësisht nga kjo masë, dërgimi i tankeve ka qenë i ngadalshëm për shkak të rezervave të vogla të shteteve, raporton agjencia “Reuters”.
“Ndoshta kjo është një shenjë se pse është shumë e rëndësishme që të bashkërendohemi me njëri-tjetrin, me SHBA-në, për shembull, dhe që t’i përgatitim këto vendime në mënyrë të kujdesshme që ato të funksionojnë”- tha kancelari gjerman.
Ukraina tani po kërkon aeroplanë luftarakë, edhe pse Gjermania nuk ka asnjë aeroplan të tipit F-16, të cilët janë përmendur në këtë kontekst.
Duke folur pak para njëvjetorit të fillimit të pushtimit rus të Ukrainës, Scholz-i tha se ka frikë që konflikti mund të bëhet “luftë shumë e gjatë”, por shtoi se Gjermania dhe Perëndimi do ta përkrahin Ukrainën aq gjatë sa të jetë e nevojshme.
nacionale
Discussion about this post