“S’do ta festojmë hapjen e negociatave”, Berisha hap “arkivat”: Çfarë premtonte Rama vite më parë

Ish-kryeministri Sali Berisha ka nxjerrë një video të kryeministrit Edi Rama nga “arkivat”, ku premtonte në Kuvend se në rast të marrjes së statusit të vendit kandidat në BE, s’do të ketë festime dhe fishekzjarre.

“Kur të marrim statusin ne nuk do të festojmë. As do hedhim fishekzjarrë si paria e vitit ’36 siç ka ndodhur deri dje, se në fakt asaj parie ia keni pasur gjithmonë zilinë dhe asaj parie jeni munduar t’i ngjani”, dëgjohet të thotë Rama.

Ish-kryeministri fjalëve të Ramës i bashkëngjit dhe atë të festës së zhvilluar dy ditë më parë në sheshin “Skëndërbej”, e cila ishte organizuar nga qeveria dhe Bashkia Tiranë me rastin e çeljes së negociatave me BE.

“Kësaj i thonë ç’më duhet mua se çfarë kam thënë unë!”, është mbishkrimi që shoqëron postimin e Berishës.