Ish-pjesëtari i UÇK-së, Salih Mustafa ka dalë sot në seancën e radhës para trupës së togave të zeza të Gjykatës Speciale në Hagë. Dëshmitari i parë, i cili po vazhdon të merret në pyetje nga trupi gjykues, ka shprehur kontradiktë mes deklaratave. Kjo gjë ka bërë që gjykatësja të dyshojë në deklaratat e tij.
Në seancat e mëparshme dëshmitari u shpreh se është dhunuar dhe rrëmbyer nga strukturat e UÇK-së duke thënë se kishte parë një person me maskë, ndërsa tani ka thënë që nuk kishte maskë.
“Po ju pyes sepse përpara UNMIK-ut në 2006 ju thatë se keni thënë se një person që kishte vënë një maskë ju kërcënoi me pistoletë. Ti ke thënë që personi kishte maskë dhe këtu po thua që nuk ka pasur maskë. Pse ke thënë ndryshe në 2006”, pyeti gjykatësja.
Ndërsa dëshmitari u përgjigj se nuk e mban mend.
“Ndoshta kam thënë, por nuk besoj që ka pasur maskë, nuk kam mundur ta shikoj. Kam harruar ndoshta kam thënë, por tash po them se nuk e kam parë me maskë”, tha ai.
Ish-pjesëtari i Ushtrisë Çlirimtare të Kosovës (UÇK) është i arrestuari i parë nga Specialja ku më 12 qershor 2020 është konfirmuar aktakuza ndaj tij, kurse arrestimi i tij u bë me 24 shtator, ku po të njëjtën ditë, është transferuar në objektin e paraburgimit në Hagë.
Më 24 shtator ishin bërë publike edhe aktakuza ndaj Mustafës. Aktakuza kundër tij për ndalim arbitrar, trajtim mizor, torturë dhe vrasje të paligjshme është konfirmuar në qershor të vitit të kaluar. Krimet për të cilat akuzohet Mustafa, sipas aktakuzës, dyshohet se janë kryer gjatë muajit prill të vitit 1999 në një qendër ndalimi në fshatin Zllash që ndodhet në rrethinën e Komunës së Prishtinës.
