Është shtyrë sërish seanca në Apelin e Posaçëm për ish-ministrin e Brendshëm Saimir Tahiri, i cili u paraqit në gjykatë i shoqëruar nga avokati i tij Maks Haxhia.
Shkak për shtyrjen është bërë fakti se gjyqtari Florian Kalaja ka kërkuar kohë që të njihej me dosjen, kjo pasi gjyqtarja Daniela Shirka vendosi të japë dorëheqjen.
Shirka është e treta gjyqtare qe tërhiqet nga çështja penale ndaj Tahirit dhe ish-drejtorit të Policisë së Vlorës, Jaeld Çelës, me argumentin se është në papajtueshmëri përderisa ka shqyrtuar një çështje të bashkëlidhur e atë të ish-ministrit.
Më herët duhet theksuar se janë larguar me dorëheqje nga kjo çështje, gjyqtarët Miliana Muça dhe Ilirjana Olldashi. Kujtojmë se ish-ministri Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj –të afërm të Tahirit.
Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.
Vendimi i shkallës së parë u prish nga Gjykata e Posaçme e Apelit, e cila e riktheu çështjen për rishqyrtim, pasi u konstatuan parregullsi në proces.
Discussion about this post