Kuvendi do të mblidhet të hënën në një seancë maratonë ku pritet të diskutohet projekt-buxheti i vitit 2024, ndërkohë që seancat e mëparshme janë karakterizuar nga përplasje dhe tensione të shumta.
Opozita ka nisur një aksion në Parlament duke bllokuar zhvillimin normal të seancave dhe komisioneve, ndërsa mazhoranca socialiste e Edi Ramës, ka rikthyer zhvillimin e mbledhjeve online të Komisioneve Parlamentare, dhe miratime në kaos të projekt-ligjeve të paraqitura nga Qeveria.
Sot opozita, përmes kreut të Grupit Parlamentar demokrat, Gazment Bardhi, denoncoi një skenar, sipas të cilit në seancën e së hënës, në sallë do të jenë forcat speciale të Gardës, që do të rrethojnë vendin ku ulen deputetët e opozitës, duke krijuar kështu një mur mbrojtës mes tyre dhe kolegëve socialist. Bardhi tha se ky urdhër i paligjshëm është dhënë nga Lindita Nikolli, kryetare e Kuvendit.
“Duke dënuar me forcë këtë degradim të regjimit të Edi Ramës, duam të sigurojmë se nuk ka gardist e polic që mund të pengojë dhe intimidojë opozitën në misionin për të kthyer parlamentarizmin dhe për të mbrojtur të drejtat kushtetutese të opozitës. Është akt i paprecedent në 32 vite demokraci, shndërrimi i sallës së Kuvendit nga salla e përfaqësuesve të qytetarëve, në sallën e gardistëve qeveritar”, tha Bardhi në një deklaratë për mediat.
Në anën tjetër burime pranë Kryeparlamentares, që njoftohen nga mediat, pohojnë se nuk ka asnjë urdhër për masa të shtuara apo përdorimin e forcës speciale të Gardës.
Opozita ka deklaruar se nuk do të tërhiqet nga aksioni opozitar, ndërsa socialistët duket se kanë gati skenarët e tyre, për të miratuar me çdo kusht projekt-buxhetin.
Nga raportimet mësohet se socialistët janë gati të miratojnë dokumentin pa debat, nëse në sallë do të ketë tensione, çka do të shënojë rastin e parë në historinë e pluralizmit, që buxheti i shtetit miratohet pa debat.
Por gjithashtu, PS duket se ka gati edhe një skenar rezervë, nëse deputetë të opozitës do të ngujohen në sallën e seancave plenare, sikundër është paralajmëruar ditë më parë, në kuadrin e përshkallëzimit të aksionit opozitar.
Socialistët në këtë rast janë gati të zhvendosen drejt Kryesisë së Kuvendit, në sallën ku zakonisht zhvillojnë mbledhjet e Grupit Parlamentar, për të shmangur kështu tensionet dhe bllokimet.
Nuk dihet se çfarë skenari opozita do të përdorë të hënën, por sot si ish-Kryeminstri Sali Berisha ashtu edhe Flamur Noka, kanë deklaruar se nuk do të ketë asnjë tërheqje. E po kështu edhe Gazment Bardhi, kreu i grupit Parlamentar, tha se nuk ka polici dhe gardist që mund të ndalë opozitën në të drejtën e saj.
Në anën tjetër, socialistët e Edi Ramës janë përballë 3 opsioneve: ose të mbushin sallën me gardistë, duke shtuar tensionet, dhe të ngrenë kartonët “jeshilë” për miratimin e projekt-buxhetit, ose të realizojnë votime në kaos, ashtu sikundër ka ndodhur në seancat e fundit, ose të shmangin sallën e Kuvendit, dhe të zhvendosin seancën në Kryesinë e Kuvendit, duke rrethuar selinë parlamentare me gardistë, mbyllur dyert me zinxhirë dhe penguar deputetët të hyjnë në mjediset e brendshme.
Discussion about this post