Kuvendi i Shqipërisë do të mblidhet ditën e sotme në seancë plenare.
Edhe këtë seancë, 6 deputetë të opozitës janë të përjashtuar pas situatës kaotike që u krijua në parlament seancën e kaluar. Bëhet fjalë për Gazmend Bardhin, Bledion Nallbatin, Flamur Nokën, Edi Palokën dhe Albana Vokshin që janë përjashtuar me 10 ditë, ndërsa Saimir Korreshi me 3 ditë.
Pavarësisht masës disiplinore të marrë nga Komisioni i Etikës me propozimin e PS, deputetët demokratë kanë paralajmëruar sërish bllokim ditën e sotme.
Gazment Bardhi një ditë më parë tha se do të jenë të pranishëm në seancë, ndonëse janë të përjashtuar. Po ashtu edhe Sali Berisha tha se opozita do të luftojë për të drejtat e saj.
Partia Demokratike nuk ka lejuar prej disa javësh zhvillimin e seancave. Lulzim Basha është distancuar nga këto akte, duke thënë se një opozitë e dhunshme i shërben Edi Ramës.
Ditën e djeshme pas përplasjes në Konferencën e Kryetarëve, u bllokua edhe mbledhja e Komisionit të Ekonomisë. Mësohet se deputetët e opozitës nuk kanë lejuar socialistët të flasin dhe këta të fundit janë detyruar të braktisin mbledhjen.
Që pas vendimit të PS për të mos pranuar komisionet hetimore për koncesionet në shëndetësi dhe ndërhyrjet në sistemin TIMS, opozita vendoi të bllokojë punimet e Kuvendit.
Discussion about this post