Seanca për Metën, Dervishaj në GJK: Proces për hakmarrje!

Përfaqësuesi ligjor i presidentit Ilir Meta, Bledar Dervishaj e ka konsideruar procesin e shkarkimit të presidentit Meta nga Kuvendi si hakmarrje.

Në seancën e sotme në Gjykatën Kushtetuese, Dervishaj theksoi se ngritja e Komisionit Hetimor nga parlamenti në vitin 2019 konsiderohet shkelje pasi ka ushtruar aktivitetin në kohën e zgjedhjeve.

“Edhe nëse një veprimtari hetimore ka nisur, në zbatim të ligjit për komisionet hetimore ka për detyrë ta ndërpresë atë sepse komisionet hetimore nuk mund të ngrihen dhe të funksionojnë në periudhë zgjedhjesh. Përveç kësaj, kuvendi përmes këtij procesi hetimor ka tentuar të ndërhyjë në mënyrën sesi presidenti kërkon të ushtrojë kompetencat e tij. Gjë që tregon se kuvendi ka shkelur parimin e ndarjes së pushteteve edhe pse në mungesë të lëndës për të shkarkuar presidentin, përsëri janë shkelur të gjitha parimet e shtetit të së drejtës, si ai i paanësisë”, tha Dervishaj.

Më tej, ai nënvizoi se pas djegies së mandateve nga opozita PD-LSI, grupet e reja parlamentare nuk përfaqësonin opozitën e vërtetë.

“Që me zhvillimin e zgjedhjeve të 2017, OSBE vuri re blerje votash, vjedhje etj. Në seancën e kaluar u morën shembuj të doktrinave kushtetuese të shteteve të ndryshme, por nuk i ngjajnë aspak asaj të shtetit shqiptar. Pas shkurtit të vitit 2019 kur u tërhoq opozita, dhe kur nisi punë shkarkimi i presidentit, grupet parlamentare nuk përfaqësonin opozitën. Këto dhe disa të tjera tregojnë që ky proces shkarkimi është bërë me qëllim hakmarrjeje”, shtoi ai.

Me këto argument, Dervishaj nënvizoi se procesi i shkarkimit të Metës është i paligjshëm.