Kuvendi do të zhvillojë sot një tjetër seancë maratonë për shqyrtimin dhe miratimin e buxhetit të vitit 2022 dhe të paketës fiskale.
Pas miratimit në parim dhe ndryshimeve që kanë pësuar këto dy dokumente të rëndësishme në komisionet parlamentare, seanca e sotme do të vulosë përfundimisht buxhetin 2022.
Në dy seancat e kaluar pati përplasje mes kryeministrit Edi Rama dhe kreut të PD, Lulzim Basha lidhur me shifrat që ofron buxheti për kategori të caktuara. Kryeministri Rama tha se ky është një buxhet që nuk ka lënë asnjë sektor apo shtresë sociale pa mbështetje, ndërsa Basha akuzoi qeverinë se e ka vënë buxhetin 2022 në shërbim të klientëve të saj.
Ndonëse mazhoranca lobon një progres ekonomik të vendit, borxhi publik ka arritur në 80%, por lidhur me këtë po qeveria ka premtuar se do ta ul në 78.9%, ndërsa mënyrën se si do e kuptojmë në vazhdim.
Shpenzimet parashikohet të shkojnë në favor të disa investimesh publike të papërfunduara nga vitet e shkuara, në rindërtim, pandemi dhe projekte të tjera infrastrukturore në ndërtimin e rrugëve, aeroporteve, investime në ujësjellës kanalizime si dhe në sektorë të tjerë.
Gjithashtu, projektbuxheti 2022 parashikon rritje të pagave për arsimtarët e mjekët, si dhe indeksim të pensioneve. Mbështetja e këtyre projekteve që do të miratohen në Kuvend, do të bëhet dhe nga eurobondi që shteti ynë do të marrë në tregjet ndërkombëtare.
Discussion about this post