Paulin Gega e gjen gjithmonë pazarin me kryetaren e Bashkisë Lushnjë për t’a furnizuar me naftë. Siç kemi raportuar, kompania e tij i ka ndarë bashkitë me Kastratin dhe po fitojnë të gjithë tenderat e karburantit.
Kryebashkiakja e Lushnjës ia jep çdo vit kontratën Gegës. Sefa vazhdon regjistron një listë të gjatë të tenderëve me “Flamur të kuq”, nuk i dridhet qerpiku se një ditë mund të japë llogari për shpërdorimin e detyrës.
Tenderi në fjalë ka si objekt ‘Blerje Gazoili për Mjetet e Bashkisë Lushnjë dhe MZSH-së’. Në fakt, duhet naftë për mjetet zjarrfikëse, se ka pasur shumë zjarre këtë vit. Megjithëse Lushnja vetëm një zjarrfikëse ka funksionale, madje edhe atë e ka pa autoshkallë.
Dhe për këtë lëvizur zjarrfikësja, Sefa ka llogaritur se duhen 8520 litra naftë, ndërsa për makinat e kryetares dhe të stafit rezervohen 17400 litra diezel.
Ajo është kujdesur që naftën ta sigurojë deri në korrik të vitit 2025 dhe në total, vlera e shpenzuar është 46 milionë lekë përfshirë edhe TVSH-në. Duke parë shkeljet gjatë zhvillimit të tenderit, nuk ka si të mos na shkojë mendja se fondi limit është fryrë që të përfitojë sa më shumë operatori ekonomik i favorizuar.
Sipas dokumenteve, vetëm firma “GEGA CENTER GKG” ka paraqitur një ofertë, edhe kjo është me vlerë sa 100% e fondit limit. Këtu regjistrohet shkelja e parë. Sefa në vend që të anulonte procedurën për mungesë konkurrence ka vazhduar me planin e saj, duke ia bërë dhuratë këtë kontratë Paulin Gegës.
Brenda 2 javësh, Sefa shpalli tenderin, përcaktoi fituesin dhe tashmë ka publikuar edhe kontratën në Agjencinë e Prokurimeve Publike, e cila shfaqet krejt indiferente karshi shkeljeve. Open Data Albania i ka vënë “Flamurin e Kuq” tenderit për të shenjuar riskun e korrupsionit.
Gijotina.com e raporton këtë rast, jo për vlerën e tenderit, por për të treguar metodën korruptive në prokurimin e fondeve.
Theksojmë këtu se ndarja në shumë tendera e karburanteve sipas institucioneve të varësisë, është një taktikë e kryetares Sefa për të zhvilluar sa më shumë prokurime dhe për të ndarë fonde shtesë.
Konkretisht, kryetarja Sefa e ka zakon që naftën e blen me tndera të tillë. Kujtojmë se një vit më parë ajo nxori nga Thesari i Shtetit 282 milionë lekë për tenderin me objekt “Blerje Gazoili për nevojat e NPP dhe Bordit të Ujitjes dhe Kullimit”. Kjo kontratë iu dha pa garë firmës “NUSHI” SH.P.K.”, në pronësi të Vangjel Nushit.
Ndërsa kompania e Paulin Gegës e ka kthyer në rutinë marrjen e përvitshme të këtij fondi nga bashkia.
Kështu, në vitin 2021, Gega e mori këtë tender pa garë, por në atë kohë oferta e tij kishte brenda një fitim të garantuar prej 5.5%, ndërsa vitin e fundit, fitimi i deklaruar është rreth 17 %.
Në vitin 2023, sërish ky tender u mor nga Gega. Sipas tabelës së mëposhtme, ky prokurim mori 70 milionë lekë (përfshirë TVSH).
Në vitin 2023, Gegës iu dhanë pa garë 4 602 000,00 lekë për të kontratën e furnizimit me naftë. E cila përfundonte në muajin qershor 2024. Pra, marrëdhënia e Gegës me Sefën është e gjatë e nisur nga paraardhësi Fatos Tushe dhe e vazhduar prej saj. Kujtojmë se Tushe u dënua për korrupsion me tenderat, pas hetimit nga SPAK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post