GJKKO vendosi sot me kërkesë të SPAK të sekuestronte inceneratorin e Tiranës. Madje në njoftimin zyrtar të SPAK thuhet se pronarë të inceneratorit janë Klodian Zoto dhe Mirel Mërtiri, ndonëse pak muaj më parë Prokuroria Speciale deklaronte se e kishte të pamundur të sekuestronte inceneratorin, pa u zbuluar pronarët e vërtetë.
Tashmë sekuestrimi i inceneratorit është vendosur, madje pak ditë pasi në SPAK ka dhënë dëshminë e tij edhe kryebashkiaku Erion Veliaj, që sipas raportimeve është pyetur për plot 4 orë nga hetuesit e BKH dhe prokurorët e çështjes.
Në kulmin e aferës së inceneratorëve, kur SPAK-ut i kërkohej me ngulm që të vepronte, gjatë një debati në Kuvend të datës 21 dhjetor 2022, Kryeministri Edi Rama, deklaronte se Tirana do të përmbytej nga plehrat nëse do të ndaleshin pagesat.
“Doni të ndalojmë pagesat për tre ditë e të shohim çfarë ndodh me Tiranën? Nëse operacionin ndalon do të vijmë në situatën me të cilën ishim në Durrës. Nuk besoj që ka ndonjë, qoftë edhe ballist, që do ta bëjë këtë gjë. Nuk paguhet ai në kërkim por shërbimi”, u shpreh kryeministri.
Në replikë me Edi Ramën reagoi deputeti Oerd Bylykbashi, i cili tha se opozita i ka kërkuar SPAK-ut që të ndjekë paratë në këtë aferë, por drejtësia s’ka këllqe të veprojë kundrejt Kryeministrit.
“Eshtë e vështirë për çdo shqiptar që të mos e kuptoj se çfarë po ndodh me inceneratorët. Këtu nuk ka nevojë se është shumë e trashë. Që në na duhet që të provojmë kryeministrit prova. SPAK nuk ka këllqe të të hetojë, i themi ndiq paranë. Borselino dhe Falconi e shpikën për mafian, por ne mafian ekemi në qeveri”, tha Bylykbashi.
Por në përgjigje të deputetit të PD-së, Rama iu përgjigj: “kërkim pa kërkim nuk është puna jonë, por e drejtësisë, se nesër me letra ata që t’i thua të çojnë në arbitrazh dhe të marrin qimet e kokës. Është shërbim për këtë qytet që është i pastër. Nuk është fjalë e ulët të ngresh dilemën për idiotin, por fjalë më të ulët se t’i thuash tjetrit ti je hajdut nuk ka”.
Tani duhet të presim dhe të shohim nëse paralajmërimi i Kryeministrit do të bëhet realitet apo jo. Ndoshta do të jetë ndër rastet e rralla në Botë kur një Kryeministër bënte deklarime të tilla, në një kohë që denoncohej një nga ato që konsiderohen si aferat më të mëdha, dhe me nnjë gjuhë kërcënuese, paralajmëronte atë se çfarë e priste qytetin dhe qytetarët po të veprohej nga drejtësia kundër zbardhjes së aferës.
Discussion about this post