Partia Demokratike ka reaguar pas sekuestrimit të pasurive të biznesmenit, Anton Gjinaj, të cilat dyshohet se janë siguruar nëpërmjet aktivitetit kriminal. Në një deklaratë për mediat, Sekretarja për Transparencën, Luften kundër Korrupsionit ne PD, Ledina Mandia, tha se firma që Gjinaj kishte në pronësi kishte përfituar tenderë prej miliona eurosh nga bashkitë socialiste. Më tej, u drejtua thirrje ndaj SPAK që të hetoheshin edhe tenderët publikë të përfituar nga firma e Gjinajt. Mandia u shpreh se të gjithë e njohin Gjinajn si të preferuarin e Ramë dhe faktet për këtë mund të gjenden shumë lehtë.
“Nuk është një i dyshuar dosido. Nga një hulumtim i zyrës tonë antikorrupsion, rezulton se firma e këtij individi ka marrë miliona euro në kontrata. Ai është i preferuari i bashkive socialiste, të cilat i kanë ofruar punë publike firmës së Anton Gjinajt, që nga asfaltimi i rrugëve, shembja e ndërtimeve të dëmtuara. PD i bën thirrje SPAK të hetojë tenderat e dhënë për Anton Gjinajn nga bashkitë socialiste”, shpreh ajo.
Dy ditë më parë Gjinajt ju sekuestruan 23 pasuri të luajtshme dhe të paluajtshme, pasi të ardhurat e tij nuk mund t’i justifikonin.
Discussion about this post