Policia Kufitare në Durrës ka goditur një tjetër tentativë për të futur shuma të konsiderueshme parash në vendin tonë, pa i deklaruar ato. Për këtë arsye, uniformat blu thonë se kanë arrestuar një 40-vjeçar, banues në Dibër i identifikuar si Jahje Zebi. Atij iu gjetën rreth 109 mijë euro dhe 600 franga me vete në furgonin që drejtonte.
Së bashku me paratë, u sekuestruan në cilësinë e provës materiale, furgoni që drejtonte i arrestuari, si dhe 2 celularë dhe pasaporta e tij, njoftoi policia. Autoritetet thonë se po punojnë për të dokumentuar burimin e parave të sekuestruara.
Sipas bluve, paratë e sekuestruara dyshohet se janë përfituar nga veprimtari kriminale
“Shërbimet e Policisë Kufitare të portit të Durrësit, si rezultat i intensifikimit të kontrolleve dhe verifikimeve të imtësishme në hyrje/dalje të Shqipërisë, me objektiva parandalimin dhe goditjen e krimeve ne kufi, në bashkëpunim me autoritetet doganore, finalizuan fazën e dytë të operacionit policor të koduar “Aseti”. Gjatë operacionit u arrestua në flagrancë shtetasi J. Z., 40 vjeç, banues në Dibër. Gjatë kontrollit në vijën e dytë, në furgonin që drejtonte ky shtetas, u gjetën 108 960 euro dhe 600 franga, që tentonte t’i fuste në Shqipëri, pa i deklaruar në pkk. Së bashku me paratë, u sekuestruan në cilësinë e provës materiale, furgoni që drejtonte i arrestuari, si dhe 2 celularë dhe pasaporta e tij. Në bashkëpunim me Prokurorinë dhe me partnerët, vijon puna për të dokumentuar burimin e parave të sekuestruara. Materialet procedurale i kaluan Prokurorisë së Durrësit, për veprime të mëtejshme”, njoftoi policia.
Të njëjtat burime kujtojnë se 3 ditë më parë, Policia e portit të Durrësit sekuestroi 223 200 euro të dyshuara produkt i krimeve dhe vuri në pranga poseduesin e tyre.
Discussion about this post