Autoritetet spanjolle kanë sekuestruar një jaht që transportonte rreth 2.1 ton kokainë, në një operacion të zhvilluar rreth 650 kilometra larg brigjeve të Galicisë.
Sipas raportimeve nga mediat e huaja, në pranga e policisë kanë rënë katër anëtarë të ekuipazhit, shtetas të Argjentinës, Uruguait, Kolumbisë dhe Shqipërisë, ndërsa një person tjetër i dyshuar për përfshirje në trafik është arrestuar në Girona, pranë Barcelonës.
Jahti 14 metra i gjatë dhe me flamur polak, është shoqëruar drejt portit të Vigos. Anija ishte nën vëzhgim që prej korrikut, kur u nis nga porti i Roses në bregdetin mesdhetar të Spanjës. Operacioni lidhet me hetimet ndaj një grupi kriminal që dyshohet se përdor jahte me vela për transportin e kokainës nga Amerika e Jugut drejt Evropës, përmes rrugës transatlantike të trafikimit të drogës.
Discussion about this post