Një sasi monetare prej 34 000 euro është sekuestruar këtë të Martë nga autoritetet në Durrës. Paratë dyshohet se janë përfituar nga aktivitete kriminale.
Eurot, sipas policisë, iu sekuestruan pasagjerëve të një fugoni që u fut në doganën e Durrës. Shuma monetare dyshohet se iu nda disa pasagjerëve nga shoferi pikërisht për të shmangur deklarimin e tyre.
Drejtuesi i mjetit, Jahje Zebi, 38 vjeç, banues në Tiranë u arrestua për veprat penale “Mosdeklarimi në kufi i të hollave dhe i sendeve me vlerë” dhe “Pastrimi i produkteve të veprës penale ose veprimtarisë kriminale”.
“Shërbimet e Policisë Kufitare të portit të Durrësit në bashkëpunim me strukturat hetimore të DVP Durrës, me mbështetjen e inteligjencës informative, kaluan në vijën e dytë, për kontroll të detajuar, automjetin (furgon) e linjës “Bari-Durrës”, me drejtues shtetasin J.Z. Gjatë kontrollit të ushtruar në këtë automjet, u gjetën dhe sekuestruan në cilësinë e provës materiale 34 000 euro të cilat J.Z. ua kishte ndarë 4 pasagjerëve në furgonin e tij, me qëllim futjen në vendin tonë, pa i deklaruar konform ligjeve në fuqi”, njoftoi policia.
Discussion about this post