Policia e Shtetit ka goditur tre raste të mosdeklarimit të të hollave në kufi, duke sekuestruar shumën prej 127.500 euro dhe dy radio si ato të policisë.
Sipas njoftimit zyrtar, në pikat e kontrollit të kalimit kufitar, në Kapshticë, Morinë e Muriqan, uniformat blu kanë konstatuar shkeljet, duke proceduar penalisht 2 shtetas të huaj dhe 1 shtetas shqiptar, të cilët nuk kanë deklaruar shumat monetare.
Kështu, mësohet se në pikën kufitare të Morinës janë sekuestruar 53.600 euro, në hyrje të RSH-së, të cilat u gjetën në automjetin me drejtues D. D, 35 vjeç, banues në Rumani.
Në Muriqan u sekuestruan 40.000 euro, në hyrje të RSH-së, të cilat u gjetën në automjetin me drejtues C. B., 37 vjeç, banues në Rumani. Në automjetin e këtij personi janë gjetur edhe 2 radio si ato që përdor Policia.
Ndërsa, në Kapshticë u sekuestruan 33.900 euro, në dalje të RSH-së, të cilat u gjetën në automjetin me drejtues K. Xh., 40 vjeç, banues në fshatin Zavalinë, Elbasan.
Në përfundim të veprimeve, nga specialistët për Hetimin e Krimeve në Drejtoritë Vendore të Policisë Kukës, Shkodër dhe Korçë janë proceduar penalisht tre personat për veprat penale “Mosdeklarimi në kufi i të hollave” dhe “Pastrimi i produkteve të veprës penale ose veprimtarisë kriminale”.
Discussion about this post