Drejtoria Vendore e Policisë Durrës, në bashkëpunim me Policinë Kufitare të Portit të Durrësit dhe autoritetet doganore, ka finalizuar një tjetër operacion kundër trafikut të lëndëve narkotike, armëve dhe mallrave të paligjshme. Operacioni, i koduar “Full Scan”, u zhvillua në vijën e dytë të kontrollit në hyrje të Portit të Durrësit, mbi bazën e informacioneve operative.
Gjatë kontrollit të detajuar të një autobusi, të drejtuar nga shtetasi Dritan Ferrunaj, shërbimet policore konstatuan: 92 gramë lëndë narkotike të dyshuar kokainë, e gjetur në çantën marsup të të arrestuarit; disa bizhuteri të dyshuara flori; 29 000 euro të padeklaruara, të gjetura brenda një çante shpine në autobus; një armë zjarri tip pistoletë me pesë krehra.
Të gjitha sendet e mësipërme u sekuestruan në cilësinë e provës materiale. Specialistët e Seksionit për Hetimin e Narkotikëve në DVP Durrës arrestuan në flagrancë shtetasin D. F., 42 vjeç, banues në Vlorë, i dyshuar për një sërë veprash penale, përfshirë: Trafikim të lëndëve narkotike; Trafikim të armëve dhe municionit; Kontrabandë me mallra të ndaluara ose të kufizuara; Kontrabandë me mallra që paguajnë akcizë; Kontrabandë me mallra të licencuara dhe të tjera; Mosdeklarim të të hollave dhe sendeve me vlerë në kufi; Pastrim të produkteve të veprës penale; Fshehje të të ardhurave.
Në bashkëpunim me Prokurorinë e Juridiksionit të Përgjithshëm Durrës, vijon puna për dokumentimin e plotë të ngjarjes, si dhe identifikimin e personave të tjerë të përfshirë në veprimtarinë kriminale.
Materialet hetimore i janë referuar Prokurorisë për veprime të mëtejshme procedurale.
Discussion about this post