Sekuestrohet toka ku burri i Xhaçkës do ndërtonte kompleksin turistik

GJKKO, me kërkesë të SPAK, vuri në sekuestro dhe tokën prej 5080 m2 që sipas SPAK u tjetërsua nga zyrtarët e bashkisë së Himarës dhe që ishte pjesë e 10 mijë metrave katrorë ku Artan Gaçi do të ndërtonte kompleksin turistik.

Sekuestroja vjen në kuadër të hetimeve për tjetërsim pronash për të cilën më 23 mars u arrestua ish-kryetari në detyrë i bashkisë së Himarës, Jorgo Goro. Sipas SPAK, Jorgo Goro në bashkëpunim me zyrtarë të tjerë, ka shpërdoruar detyrën në dy raste, duke tjetërsuar dy prona në Dhërmi. Bëhet fjalë për një sipërfaqe prej 10592 m2, ku  përfitues fundor i truallit ka qenë biznesmeni Artan Gaçi, i cili planifikonte ndërtimin e një kompleksi turistik si investitor strategjik i shpallur nga qeveria Rama, në kohën kur bashkëshortja Olta Xhaçka ishte ministre.

Skema

Sipas hetimeve parpake, Goro në bashkëpunim me persona të tjerë nën hetim, kanë realizuar me veprime konkrete zhvendosjen faktike në terren të një sipërfaqe tokë bujqësore prej 5 080 m², duke ja mbivendosur atë një  pasurie tjetër në pronësi të shtetit.

Shtetasit nën hetim, vlerëson akuza, kanë tejkaluar të gjitha kompetencat që ligji i njeh, duke u shprehur për ekzistencën e një mbivendosje pasurish të paluajtshme në terren dhe më pas duke konfirmuar një plan vendosje, e cila nuk i korrespondon rrethanave faktike në terren.

Kjo planvendosje ka shërbyer jo vetëm për transaksionet e mëpasshme ndërmjet subjekteve të ndryshëm por edhe për zhvillimin e pronës, përfshirë këtu pajisjen me leje ndërtimi për një kompleks turistik në emër të shoqërisë tregtare të Artan Gaçit, i cili do të ndërtohet mbi këtë sipërfaqe toke, por edhe mbi atë prej 5 512 m² të sekuestruar më parë nga Prokuroria e Posaçme.

“E gjithë sipërfaqja e tokës bujqësore prej 10 592 m², e cila i është nënshtruar procedurave të sekuestros preventive në dy faza, është në fakt pronësi shtet dhe rezulton të jetë tjetërsuar e më pas zhvilluar nga një subjekt privat”, njofton SPAK.

Pavarësisht se Gaçi rezulton përfitues fundor i tokës, ndaj tij nuk është ngritur ende asnjë akuzë.

Lexo edhe:

Tjetërsimi i tokave, SPAK: Pse u vu në pranga Jorgo Goro

Xhaçka Strategjike – Historia që ‘hëngri kokën’ e Jorgo Goros