Senati Amerikan ka miratuar me 67 pro dhe 31 kundër kandidaturën e James O’Brien si Ndihmës-Sekretar të Shtetit për Çështjet Europiane dhe Euroaziatike.
O’Brien që ka shërbyer dikur si ndihmës i afërt dhe këshilltar i ish-Sekretares së Shtetit Madeleine Albright është nga njohësit më të mirë të rajonit të Ballkanit në Departamentin e Shtetit.
James O’Brien ka qenë pjesë e delegacionit amerikan gjatë negociatave në Rambuje ndërmjet Kosovës dhe Serbisë, në vitin 1999.
Nga viti 2022, Jim O’Brien punon si shef i Zyrës së Koordinimit të Sanksioneve, me gradën e ambasadorit, në Departamentin Amerikan të Shtetit.
Sipas njoftimit nga Shtëpia e Bardhë, O’Brien më parë shërbeu në dy administrata amerikane, si i dërguar special presidencial.
Me miratimin e kandidaturës së O’Brien duket se ka përfunduar edhe mandati i Yuri Kim, ish-ambasadores amerikane në Shqipëri, si zëvendësuese në funksionin e Ndihmës Sekretares së Shtetit.
Pas largimit nga Shqipëria, Kim morri përkohësisht funksionin në DASH, për shkak se kandidatura e O’Brien ishte e bllokuar.
Discussion about this post