Serbia i ndalon hyrjen ish-ministres malazeze, reagon Milatoviç

Serbia njofton se i ka ndaluar hyrjen në vend ish-ministres malazeze të Integrimeve Evropiane, Jovana Maroviç.

Lidhur me këtë ka reaguar presidenti malazez Jakov Milatoviç, duke thënë se Maroviq nuk paraqet kërcënim për sigurinë.

“Jam i befasuar që asaj iu ndalua hyrja në Serbi, veçanërisht duke pasur parasysh angazhimin e saj shumëvjeçar në sektorin civil si në vend ashtu edhe në rajon. Jam i sigurt që Jovana nuk është kërcënim për sigurinë”, thuhet në reagimin e tij.

Për një kohë të gjatë, Maroviç ishte subjekt i shkrimeve të tabloideve në Serbi, për shkak të pikëpamjeve të saj të deklaruara publikisht, në të cilat ajo është sulmuar brutalisht nga këto medie.

Ajo ishte ministre e Integrimeve Evropiane të Malit të Zi dhe zëvendëskryeministre në qeverinë e Dritan Abazoviç.

Maroviç dha dorëheqjen nga të gjitha pozitat politike në fund të nëntorit të vitit të kaluar.