Drejtuesit e Federatës Italiane të Futbollit, bëjnë me dije se janë gati për një hap shumë të rëndësishëm, siç është ai i hapjes së dyerve të stadiumeve me kapacitet të plotë. Që nga marsi i vitit 2020, stadiumet italiane u mbyllën dhe vetëm në periudha të veçanta u hapën në mënyrë të pjesshme, me kufizime të ndryshme. Ndërkohë numri ka qenë i kufizuar sa i përket kapacitetit dhe personave që mund të lejoheshin brenda stadiumeve, ose futeshin me teste COVID-ai apo të vaksinuar.
Por tani Federata Italiane dhe qeveria janë ulur në tavolinën e bisedimeve dhe janë gati të ndryshojnë plotësisht situatën. Ministri i Shëndetësisë ka aprovuar në parim planin që në Serinë A, stadiumet të hapen plotësisht duke filluar nga muaji mars, ndërsa kapaciteti i deritanishëm prej 50%, do të rritet gradualisht derisa të mbërrijë në heqjen e plotë të kufizimit të numrit të personave.
Liga e Serisë A kishte kërkuar vazhdimisht bisedime me qeverinë italiane për këtë kthesë të rëndësishme dhe tani, duket se po merr dritën e gjelbër, që mund të kthejë përsëri futbollin italian në shinat e duhura dhe ta ndihmojë në këtë periudhë krize.
Discussion about this post