Interi ka mposhtur 2-0 Lazion në “San Siro” në ndeshjen e fundit të javës së njëmbëdhjetë të Serie A, duke u rikthyer në vendin e parë të renditjes, në kuotë të barabartë pikësh me Romën.
Skuadra e trajnerit Cristian Chivu e nisi ndeshjen në mënyrën më të mirë të mundshme, duke kaluar në avantazh që në minutën e tretë. Kapiteni Lautaro Martinez shënoi një gol të bukur me të djathtën në cepin e portës, pas një rikuperimi të shkëlqyer të topit nga Bastoni në zonën e Lazios.
Pas golit, reagimi i skuadrës së Maurizio Sarrit ishte i vakët dhe pa rrezik serioz për portën e Sommerit, ndërsa Interi vazhdoi të kontrollonte lojën me siguri dhe intensitet.
Në pjesën e dytë, në minutën e 62-të, Dimarco dhuroi një asist perfekt për Bonny-n, i cili me qetësi dyfishoi rezultatin dhe vulosi fitoren e zikaltërve.
Lazio tentoi të reagojë në fund, por pa fat: Gila goditi traversën, ndërsa një gol i Zielinskit u anulua për pozicion jashtë loje.
Kjo ishte fitorja e tretë radhazi e Interit në kampionat dhe e 11-ta në 12 ndeshjet e fundit në të gjitha garat, një tjetër sinjal i qartë se skuadra e Chivu po ecën me ritëm të kampionëve.
Me këtë fitore, Interi mori hak për atë barazim 6 muaj më parë me Lazion, që i kushtoi zikaltërve titullin kampion.
Goli i Lautaros (Video)
Goli i Bonyt (Video)
Discussion about this post