Lazio mund Veronën, Juve dhe Milani ndahen në barazim ashtu si dhe Leçe e Monza. Këto ishin rezultatet e ndeshjeve të Serisë A, të luajtura këtë të shtunë në kuadër të javës së 34-të.
Siparin e hapi Leçe-Monza.
Barazim 1-1 në Lecce-Monza, sfidë ku të dy golat u realizuan në minutat shtesë të takimit.
Nikola Krstovic (90+2’) kaloi vendasit në avantazh falë një goli shumë të bukur, por një penallti e dyshimtë u akordua për Monzën më pas.
Që u shndërrua në gol nga kapiteni Matteo Pessina. Ylber Ramadani vijon të jetë i sëmurë dhe nuk u aktivizua as këtë ndeshje për Leccen.
Ndërkohë që Medon Berisha, shqiptari tjetër i ekipit nga Salento, e ndoqi takimin nga pankina.
Juventusi ndan pikët me Milanin
U mbyll pa fitues dhe me rrjeta të paprekura ndeshja më e rëndësishme e javës së 34-t të Serisë A mes Juventusit dhe Milanit në “Allianz Stadium”.
Dy gjigantët e futbollit italian ndanë pikët në këtë ndeshje, duka ruajtur të njëjtat pozita në renditje dhe të njëjtën diferencë pikësh mes tyre (70 Milani, 65 Juventusi).
Shumë raste të krijuara në portat respektive, sidomos në atë të ruajtur nga Sportiello, por topi sikur nuk donte të futej në rrjetë.
Vlahovic në fundin e pjesës së parë dhe Kostic në të 50-tën vinë në provë aftësitë e portierit të Milanit, ndërsa në të 66-tën Ruben Loftus-Cheek iu afrua golit nga një distancë e largët, me topin që shkoi ngjitur me shtyllën.
Arkadiusz Milik gjithashtu pati një rast në të 73-tën, por sërish Marco Sportiello tregon aftësitë e tij duke i mohuar golin.
Në minutat e fundit asgjë nuk ndryshoi, kështu që Juventusi e Milani ndanë pikët, për të ruajtur pozitat në renditje.
Lazio në garë për zonën “Champions”
Lazio vijon të mbetet në garë për zonën “Champions” teksa mbrëmjen e kësaj të shtune mundi me rezultatin minimal 1-0 Veronën në “Olimpico”.
Pjesa e parë ishte përgjithësisht e ekuilibruar. Në të dytën, ishin vendasin ata që morën kontrollin e lojës, duke krijuar edhe rastet për shënim. Pas shpërdorimeve të disa mundësive të mira për të çuar topin në rrjetën e kundërshtarëve, goli erdhi në minutën e 72-të.
Shënoi i ardhuri nga stoli Mattia Zaccagni, i cili rikthehet vendimtar për “shqiponjat” pas dëmtimit që e mbajti disa javë jashtë fushës. Pas një pasimi nga Luis Alberto, me një goditje nga brenda zone në pozicion veritikal, Zaccagni ndëshkoi ish-skuadrën e tij.
Goli i tij i dha tre pikët e radhës Lazio-s, që shënon fitoren e katërt radhazi në kampionat.
Në klasifikim, Roma e vendit të pestë është tre pikë larg, me një ndeshje më pak (luan nesër me Napolin).
Discussion about this post