Java e 15 e Serisë A nis këtë të premte me ndeshje të forta dhe mjaft interesante. Vëmendja është në Bergamo, aty ku Milani do të luajë një transfertë delikate pasi përballet me një nga ekipet më në formë të momentit si Atalanta.
Megjithatë, pavarësisht formës të mirë që po kalojnë, për kuqezinjtë nuk ka justifikime dhe detyrim është vetëm fitorja. Për trajnerin Paulo Fonseca, në dyshim janë Loftus-Cheek dhe Fofana, ndërsa pjesa tjetër është gati. Tekniku portugez në prag të takimit, vlerësoi maksimalisht Atalantën dhe lojën e saj, por theksoi se ka besim te djemtë e tij që do të marrin një rezultat pozitiv.
“Unë mendoj se nuk ka kurrë një moment të mirë për t’u përballur me Atalantën. Ne po rritemi dhe skuadra ka besim. E dimë se na pret një përballje e vështirë. Atalanta numëron tetë fitore në tetë ndeshje, ndërsa kanë shënuar 26 gola dhe kanë pësuar vetëm 4 të tillë. Është një skuadër shumë e fortë dhe ndeshje shumë e vështirë. Megjithatë, ne jemi gati dhe do të luajmë me besim në fushë”, deklaroi Fonseca.
Nga ana tjetër, te Atalanta mungon Zappacosta, Scamacca dhe Cuadrado. Atalanta me vetëm një pikë larg Napolit kryesues do të kërkojë të marrë përkohësisht të paktën vendin e parë, një detyrë e vështirë, por, sipas trajnerit Gasperini, asgjë nuk është e pamundur.
Ndeshja Milan-Atalanta do të luhet këtë të premte, duke nisur prej orës 20:45.
Ndërkohë, më herët Inter do të përballet me Parmën, në San Siro. Në letër zikaltrit janë favoritë, megjithatë Parma ka treguar se përballë ekipeve të mëdha ka surprizuar shpeshherë dhe për këtë do të tentojë për të bërë surprizën.
Sfida nis në orën 18:30.
Discussion about this post