Serie A ka miratuar një rregullore të re për sezonin 2026-2027, duke vendosur procedura më të qarta për ndeshjet e shtyra ose të ndërprera.
Qëllimi i ndryshimeve është të shmangen paqartësitë dhe të lehtësohet menaxhimi i kalendarit, i cili po bëhet gjithnjë e më i ngjeshur.
Sipas rregullave të reja, një ndeshje që nuk zhvillohet për arsye të zakonshme do të rikuperohet ditën pasuese.
Përjashtim do të bëjnë rastet kur fusha është e papërshtatshme, periudhat e ndeshjeve të FIFA-s, vendimet e Federatës ose kur skuadrat nuk kanë të paktën dy ditë pushim mes angazhimeve zyrtare.
Në këto raste, takimi do të luhet në datën e parë të disponueshme.
Rregullorja e re ndryshon edhe mënyrën e trajtimit të ndeshjeve të ndërprera.
Nëse nuk ka masa disiplinore nga drejtësia sportive, nuk do të riluhet e gjithë sfida, por vetëm minutat e mbetura nga momenti i ndërprerjes.
Në fushë do të mund të aktivizohen lojtarët që ishin të federuar dhe pjesë e skuadrës në momentin e ndërprerjes, si edhe deri në tre futbollistë të afruar më pas, për sa kohë nuk vijnë nga klubi kundërshtar.
Ndërkohë, lojtarët e zëvendësuar ose të ndëshkuar me karton të kuq para ndërprerjes nuk do të kenë të drejtë të rikthehen në lojë.
Discussion about this post