Sërish tensione në Zveçan, sulmohet me gurë makina e policisë së Kosovës

Një automjet i Policisë së Kosovës është penguar dhe sulmuar me mjete të forta nga protestuesit serbë.

Këtë për Gazetën Express e konfirmoi zëdhënësi i Policisë së Kosovës, Baki Kelani.

Ai tha se si pasojë e sulmit me gurë, makinës i është thyer xhami.

“Mund të konfirmojmë se, një veturë policore e cila ka qenë me detyrë zyrtare duke patrulluar në drejtim të komunës së Zveçanit, është penguar dhe sulmuar me mjete te forta nga protestuesit.

Si pasojë e sulmit me mjete të forta (gurë), veturës i është thyer xhami, e cila më pas është larguar nga ai lokacion.

Nuk raportohet për të lënduar, përderisa rasti është duke u hetuar”, tha Kelani për gazetën Express.