Ish-kryetari i Kuvendit të Shqipërisë, Servet Pëllumbit do të përcillet ditën e sotme për në banesën e fundit, nga familjarët, miqtë, të afërmit dhe kolegët. Ai u nda nga jetën mbrëmjen e djeshme në moshën 89-vjeçare. Ceremonia e homazheve për të u zhvillua në Teatrin e Operas dhe Baletit, ku morën pjesë personalitete të politikës, akademisë dhe shoqërisë civile. Ata nderuan dhe përkujtuan për herë të fundit, figurën e tij dhe vlerësuan kontributin e tij në sferën politike.
Ish-kryetar i Kuvendit të Shqipërisë, njihej si një prej figurave, që ka luajtur rol kryesor në zhvillimet politike të vendit që prej fillimeve të tranzicionit. Rrugëtimi i tij nisi në Korçë, ku lindi në vitin 1936, për të vazhduar më tej me studimet e larta dhe një karrierë të gjatë si profesor i filozofisë, fushë në të cilën kontribuoi me dhjetëra botime dhe studime shkencore.
Pas viteve ’90, ai u bë një nga kolonat kryesore të reformimit të së majtës shqiptare, duke luajtur një rol vendimtar në transformimin e Partisë Socialiste dhe në orientimin e saj drejt vlerave demokratike evropiane. Kulmi i angazhimit të tij institucional ishte drejtimi i Kuvendit të Shqipërisë gjatë viteve 2002–2005.
Gjatë kësaj periudhe, ai u shqua për një stil udhëheqjeje që bazohej te konsensusi dhe maturia, duke u respektuar si nga aleatët ashtu edhe nga kundërshtarët politikë për aftësinë e tij për të ruajtur etikën parlamentare edhe në momentet më të tensionuara. Për këtë kontribut të jashtëzakonshëm në forcimin e shtetit ligjor dhe kulturës politike, ai u nderua me dekoratën e lartë “Nderi i Kombit”.
Discussion about this post