Disa orë para seancës së parë për sesionin e ri parlamentar, Niko Peleshi në cilësinë e kryetarit të grupit, ka mbledhur deputetët, ku janë dhënë dhe porositë e fundit.
Në takimin me dyer të mbyllura që ka zgjatur 30 minuta, kreu i grupit iu ka kërkuar deputetëve që këtë sesion të ri parlamentar të jenë të pranishëm në çdo komision dhe seancë plenare dhe të evitojnë mungesat.
Nga ana tjetër deputetët socialistë janë vënë në dijeni se sjellja e opozitës do të jetë agresive, dhe për këtë përgjigja që ata duhet të japin për kundërshtarët e tyre, është respektimi i rregullores së Kuvendit dhe shmangia e provokimeve.
Në këtë takim nuk është diskutuar se cili do të jetë qëndrimi i mazhorancës për mandatin e Olta Xhaçkës apo Vullnet Sinajt, të cilët akuzohen nga opozita për shkeljen e Kushtetutës dhe ligjit për konfliktin e interesit.
Deputetët, do të rikthehen sot në një seancë plenare, e para në drejtimin e Elisa Spiropalit si kryetare. Seanca pritet që të nisë pikërisht me një fjalim të Spiropalit, në orën 17:00, dhe pritet që të zgjasë pak.
Veç Kryetares së Kuvendit, sot pritet të marrin fjalën edhe Niko Peleshi, Gazment Bardhi, Mesila Doda dhe Agron Duka në cilësinë e krerëve të Grupeve Parlamentare.
Pas seancës së të hënës, e radhës është ajo e 12 shtatorit, ku priten dy vendime të rëndësishme sa i përket mandatit të deputetëve socialist Olta Xhaçka dhe Vullnet Sinaj.
Discussion about this post