Këtë të dielë në orën 13:45 Tirana do të përballet me skuadrën e Laçit në ndeshjen e vlefshme për javën e katërt të Abissnet Superiore në stadiumin ‘Selman Stërmasi’.
Teksa ka folur në prag të kësaj sfide trajneri i ‘Bardhebluve’, Orges Shehi është shprehur se ‘Bardhezinjtë’ e Shqipërisë janë kundërshtarë shumë të fuqishëm, teksa shtoi ekipi i tij duhet të jetë më i shpejtë.
“Kemi ndeshje të rëndësishme nesër, kjo edhe për shkak se kundërshtari është faktor në futbollin shqiptar në vitet e fundit. Mbase donin më shumë pikë dhe kjo e bën një skuadër të fortë. Skuadra ka fizionominë e lojës, penalizohemi për shkak të fushës dhe orarit. Na ul ritmin sepse duhet të jemi më të shpejtë, do luajmë njësoj. Kemi vend për përmirësim nga ndeshja në ndeshje, të jemi mirë nesër që mos pësojmë gola që i kemi pësuar në këto javë.”- tha ai.
Më tej tekniku ka shtuar se kampionati këtë sezon është shumë i fuqishëm dhe sipas tij kjo gjë duket qartë nga lojtarët e Kombëtares që tashmë luajnë në Superligë. Ndërsa ngriti pyetje se pse ndeshjet në ‘Elbasan Arena’ dhe ‘Air Albania’ dalin më mirë, duke lënë të kuptohet rëndësinë që ka infrastruktura.
“Kampionati shqiptar është i fortë, këtë e tregojnë edhe lojtarët e Kombëtares kur vijnë luajnë këtu. Thonë se ka skuadra të forta dhe këtë e tregon edhe loja. Infrastruktura dhe orari ndikojnë shumë, pse ndeshjet në Elbasan apo në “Air Albania” dalin mirë?”, -vijoi më tej Orges Shehi.
Aktualisht Tirana ndodhet në vend të pestë të tabelës së Superiores me pesë pikë, ndërsa Laçi renditet në vend të shtatë me dy pikë në tre ndeshje./K.T/Gijotina.com
