Trajneri i Southampton, Ralph Hasenhuttl ka zbuluar së fundmi gjendjen e lojtarëve që ishin të dëmtuar, përfshirë këtu edhe të yllit ‘Kuqezi’ Armando Brojës.
Duke folur përpara ndeshjes kundër Norwich për javën e 12 të Premier League, Hasenhuttl theksoi se Broja është stërvitur me pjesën tjetër të skuadrës dhe se do të jetë gati të luajë më 20 nëntor kundër ‘kanarinave’.
“Ward-Prowse, Livramento, Broja dhe Stephens kanë qenë futbollistët me probleme fizike dhe që kanë punuar nën kujdesin e ekipit mjekësor. Megjithatë përveç Stephens, të gjithë të tjerët kanë kryer stërvitje të plota në fushë gjatë këtyre ditëve dhe do të jenë në dispozicion për sfidën ndaj Norwich. Broja ka pasur një problem në kyç, që duket se e ka kaluar totalisht tashmë dhe është gati për sfidën e radhës”, tha ndër të tjera Hasenhuttl.
Ndërkohë rikujtojmë se çështja e dëmtimit të Brojës është kthyer në kryetemë, duke ditur se talenti nuk udhëtoi drejt Shqipërisë për ndeshjen e fundit kualifikuese të Botërorit ‘Katar 2022’, kundër Andorës./K.T/Gijotina.com
Discussion about this post