Teuta do të ndeshet këtë të dielë në orën 13:45 me Skënderbeun për javën e 9 të Superligës. Duke folur në konferencën për mediat në prag të kësaj ndeshjeje, trajneri i ‘Djemve të Detit’, Edi Martini u shpreh se kjo do të jetë një përballje e vështirë, duke ditur se korçarët mundën Kukësin javën e kaluar.
“Ekipet janë aty-aty, edhe pse Skënderbeu është poshtë në renditje. Mos të harrojmë që javën e fundit ata fituan me Kukësin. Një lojtar të mungojë është shumë, jo më pesë. Është ndeshje e fortë me Skënderbeun. Mund të fitosh, por goleada nuk mund të ketë. Synimi është të fitojmë dhe do e kërkojmë nga fillimi në fund këtë gjë. E kam thënë edhe më parë që po kalojmë një tranzicion.”-tha ai.
Më tej shtoi se ky kampionat është thuajse i njëjtë me atë të sezonit të kaluar, duke theksuar se ekipi i tij do të ringrihet shumë shpejt.
“Ekip do ringrihet fizikisht dhe do jemi në rrugën e duhur. Normalisht e kam formacionin në kokë, pasi mund të ketë ndonjë ndryshim të vogël. Kampionati sivjet është njëlloj si vjet. Vjet ishte Vllaznia ndërsa sivjet po ndodh me Tiranën. Normal do ketë luhatje. Gjithsesi unë shpresoj që të bëjmë kampionatin e vjetshëm”, shtoi tekniku i Teutës.
Rikujtojmë se në këtë përballje durrsakët vijnë pas disfatës ndaj Laçit, ndërsa kërkohen me patjetër 3 pikët. Aktualisht Teuta qëndron në vend të 3 me 12 pikë, 8 më pak se Tirana e vendit të parë, ndërsa kundërshtari i kësaj sfide qëndron në vend të 9 me vetëm 6 pikë në 8 takime të zhvilluara./K.T/Gijotina.com
Discussion about this post