Sfida me Tiranën, Memelli: Kemi një mungesë, por jemi çdo ditë e më të fortë

Këtë të shtunë në orën 16:45 Skënderbeu do të presë Tiranën për ndeshjen e javës së 10-të të Superligës.

Duke folur në prag të kësaj sfide, që konsiderohet shumë e vështirë, trajneri i korçarëve, Migen Memelli ka ftuar tifozët e ekipit të tij që të shkojnë për t’i mbështetur në stadium.

“Me Tiranën është një ndeshje e rëndësishme. Do doja të thoja si fillim të kishim qytetarët e Korçës dhe tifozët e Skënderbeut në stadium, sa më të shumtë, që ta mbështesin ekipin. Mos harrojmë se tejmbushja e stadiumit me tifozë na sjell lojtarin e 12-të dhe është një shtysë e jashtëzakonshme për lojtarët që të japin maksimumin.”-tha ai.

Më tej tekniku shtoi se Skënderbeu po rritet, ndërsa bëri me dije së në këtë ndeshje do të kenë mungesën e titullarit Elvi Berisha, i cili nuk është në gjendje të mirë shëndetësore.

“Gjithmonë e kemi kërkuar mbështetjen e tifozëve. Skuadra nuk ka qenë në pritshmëritë e të gjithëve. Gradualisht skuadra po rritet, ka bërë paraqitje të mira. Dy rezultatet e fundit, bashkë me Kupën tre, kanë qenë të mira. Shpresojmë që edhe nesër ndaj Tiranës të bëjmë një paraqitje edhe më të mirë.

Di që skuadra ime është sjellë mirë në stërvitje, ka punuar shumë. Lojtarë janë të gatshëm, veç Elvi Berishës që ka pasur një infeksion në bajame. Pjesa tjetër pastaj është ok. Do tentojmë të marrim tre pikët, e bëjmë këtë në çdo ndeshje.”-deklaroi MigenMemelli./K.T/Gijotina.com