Sfidë Berishës, Basha propozon Kuvendin Kombëtar më 18 dhjetor

Kryedemokrati Lulzim Basha ka sfiduar liderin opozitar Sali Berisha, pasi ky i fundit kishte deklaruar mbajtjen e Kuvendit më 11 dhjetor.

Duket se ka nisur një luftë Kuvendesh, pasi kryedemokrati në mbledhjen e PD-së, vjen me një vendim ku thërret Kuvendin legjitim më 18 dhjetor.

Basha ka ironizuar sot duke u shprehur se Berisha po shkel statutin dhe po poshtëron anëtarësinë e PD-së.

Sipas Bashës, Kuvendi i thirrur nga Berisha në 11 dhjetor nuk është legjitim dhe se ai si kryetar partia do ta mbledhë Kuvendin kombëtar në 18 dhjetor.

“Çfarë pune ka me PD, por nëse doni edhe me Sali Berishën: Qifja, Suel cela, Rrahman Rraja, Tom Dosh? Shumë njerëz jo vetëm demokratët pyesin:  Ç’ne këta me Kuvendin e Partisë Demokratike? 
 Pse kaq të investuar këta për një akt të tillë?  Shpjegimi është i thjeshtë: Disa duan të  jenë faktorë në PD dhe të vijojnë aferat e tyre korruptive  e kriminale me PD-në siç kanë bërë e bëjnë me PS e Ramës. Disa të tjerë, që presin të shpallen non grata, u intereson kjo përplasje për të mbrojtur veten e tyre”, është shprehur ai.

Kryedemokrati është shprehur me ngazëllim se: Kemi sakrifikuar shume për të mos e bërë pis PD. Për ta mbajtur Partinë Demokratike të pastër nga krimi. Ska për të ndodhur as tani, as sot dhe as nesër. Nuk do të ketë kuvend kombëtar të PD me 11 dhjetor. 11 Dhjetorin nuk mund ta shndërrojë dot Sali Berisha, nga dita e lirisë, dita e demokratëve, dita e demokracisë, në ditën e bunkerizimit të PD, në ditën e izolimit të PD.