Presidenti Ilir Meta ka reaguar pas ngjarjes makabre të ndodhur në “Dos Bosko” ku plumbat i morën jetën një të riu dhe plagosën 4 të tjerë. Masakra e mbrëmbshe, sipas Metës përbën një sfidë të hapur të grupeve të krimit të organizuar ndaj shtetit, por edhe një kërcënim të rëndë për sigurinë dhe për jetën e qytetarëve.
“Dënoj me forcë ngjarjet kriminale të ditëve të fundvitit dhe të ditëve të para të vitit të ri, të ndodhura në disa qytete të vendit, e veçanërisht ngjarjen fatale në rrugën “Don Bosko”, në Tiranë, ditën e djeshme, që përfundoi me vrasjen e një shtetasi dhe plagosjen e disa të tjerëve. Një akt i tillë kriminal, në një nga zonat më të populluara të kryeqytetit, jo vetëm përbën një sfidë të hapur të grupeve të krimit të organizuar ndaj shtetit dhe institucioneve të tij, por edhe një kërcënim të rëndë për sigurinë dhe për vetë jetën e qytetarëve të Tiranës”, shkruan Meta.
Ndër të tjera, Meta i bën thirrje policisë të forcojnë punën, së pari për arrestimin e autorëve të këtij krimi të rëndë, por edhe për të forcuar bashkëpunimin për të parandaluar ngjarje të tilla.
Nga të shtënat drejt lokalit humbi jetën Erion Çela. Të plagosur mbetën vëllai i tij Blerim Çela, daja i tyre Edmond Crroj, Arben Dani dhe 19-vjeçari Azbi Selimaj. Sipas grupit hetimor, dyshohet që objektiv i sulmit me armë të ketë qenë Edmond Crroj, daja i dy vëllezërve Çela, viktimës Erion dhe të plagosurit Blerim.
Discussion about this post