Aktivistja afgane për të drejtat e të rinjve Wazhma Sayle tha se mbeti e habitur kur pa një fotografi në internet, ku gratë ishin të veshura komplet në të zeza ndërsa po protestonin në mbështetje të talebanëve në Universitetin e Kabulit.
36-vjeçarja e cila qëndron në Suedi, më vonë postoi një fotografi të veten në Twitter e veshur në një fustan të gjelbër të çelët dhe argjend dhe shkroi: “Kjo është kultura afgane dhe se si vishemi ne! Çdo gjë më pak se kjo nuk përfaqëson gratë afgane”.
“Është një luftë për identitetin tonë”, ka thënë Sayle në intervistë përmes telefonit. “Nuk dua të identifikohem sipas mënyrës që talebanët duan, nuk mund ta toleroj këtë. Këto rroba, kur i vesh, flasin për vendin nga unë vij”.
Gra të tjera afgane në botë kanë postuar fotografi të ngjashme, raporton Al Jazeera.
“Të paktën ato janë të afta t’i tregojnë botës se ne, gratë e Afganistanit, nuk i mbështesim talebanët”, ka thënë Fatima e cila qëndron në kryeqytetin afgan.
“Nuk mund të postoj fotografi të tilla apo të veshë rroba të tilla më. Nëse i vesh, talebanët do të më vrisnin”, shtoi ajo.
Shumë gra kanë thënë se besojnë se protesta e supozuar që u shfaq nëpër rrjete sociale dhe media, ishte e organizuar dhe se njerëzit e veshur në burka të zeza nga koka te këmbët në fakt ishin burra.
Fushata online me hashtag si, “#donottouchmyclothes” dhe “Afganistanculture” filloi kur historiani afgan Bahar Jalali shkroi duke kritikuar veshjet e zeza të veshura nga protestuesit në universitet.
