Parlamenti i ka hapur rrugë nisjes së procedurave për ndryshimet kushtetuese që synojnë zgjatjen e mandatit të dy institucioneve të rivlerësimit të gjyqtarëve dhe prokurorëve. Ky propozim është bërë nga shumica e majtë, për shkak se qershorin e ardhshëm Komisionit të Pavarur të Kualifikimit dhe Komisionerëve publik u përfundon mandati 5 vjeçar.
Për socialistët, ky mandat duhet të zgjatet deri në vitin 2024.
Përfaqësuesit e opozitës e braktisën mbledhjen pasi kërkesa e tyre nuk u mor parasysh. Ata kërkuan që kjo çështje të diskutohej pas dy ditësh së bashku me kërkesën e paraqitur nga ata, për disa ndryshime të tjera në kushtetutë që do të mundësonin vettingun në politikë.
Delegacioni i Bashkimit Evropian dhe Operacioni Ndërkombëtar i Monitorimit kanë qenë pro shtyrjes së mandatit, të njëjtin mendim ka pasur dhe ambasadorja amerikane.
Ndryshimet në kushtetutë kërkojnë një shumicë prej dy të tretash të parlamentit e për pasojë një votë konsensuale mes palëve. Nëse opozita nuk do t’i bashkohej nismës së shumicës atëherë procesi i rivlerësimit, do të duhet të kryhet nga Këshilli i Lartë Gjyqësor për gjykatësit dhe Këshilli i Lartë i Prokurorisë, për prokurorët.
Sipas vlerësimeve, deri në fund të mandatit në fuqi, institucionet e Vettingut do të mund të përfundonin procesin vetëm për dy të tretat e mbi 800 gjyqtarëve dhe prokurorëve
